LEGAZPI CITY – Liwat na nagpagirumdom an mga otoridad sa pag-otob sa precautionary measures kun nagkakarigos sa dagat makalihis na duwang lalaki an mahiling na nagpapataw-pataw sa kadagatang sakop kan Malawmawan Island sa Brgy. Buenavista banwaan kan Castilla, Sorsogon.
Sa nagunong impormasyon kan Bombo Radyo Legazpi, mismong an caretaker kan isla na si Jonathan Lozano an nakadiskubre sa wara nang buhay na lawas kan sarong lalaking pigkakarkulong nasa nasa 5’6″ an taas, 40 hasta 50-anyos an edad, nakasulot nin itom na T-Shirt kan sarong fraternity asin kolor blue man an shorts.
Tulos kaining ipigtaong-aram sa oficina kan Bantay Dagat an nahiling alagad kan magsagibo nin follow-up monitoring an mga otoridad, saro pang bangkay an nakua na nagpapataw-pataw man nagkapirang metro sana an distansya sa enot na bangkay.
Dinara man sa ospital an mga ini makalihis na mai-awas alagad dae na nakasalbar pa sa kagadanan.
Sa ospital, digdi na nabisto kan mga parientes asin amigo an duwa na sinda Ajay Jimena, 24-anyos asin Roberto Buban, 45-anyos na anas hale pa sa Calamba, Laguna.
Pigsasabing nasa family outing an mga ini asin maogmang nagkakarigos alagad makalihis an nagkapirang oras, dae naman nahiling an duwa.
