LEGAZPI CITY – Nagin matrayumpo an isinagibong duwang aldaw na bench marking kan Smoke Free Unit Legazpi sa Davao City.
Sa intrevista kan Bombo Radyo Legazpi ki Councilor Alexander Jao, kan Legazpi City Committee on Health and Human Rights, piglalaoman na sa masunod na bulan magigin epektibo na an full implementation kan nasabing ordinansa.
Sa irarom kaini, nakatalaan na maglibot sa mga establisyemento, opisina kan gobiero asin mga pampublikong lugar dapit sa paggamit nin sigarilyo asin paggamit nin vape kan mga menor de edad.
Segun ki Jao, mas strikto asin mahigot na ipapaotob an nasabing ordinansa oras na matapos na an pagbilog nin Implementing Rules and Regulation para digdi.
Plano man na makaigwa nin mahigot na monitoring sa mga tindahan na harani sa mga eskwelahan na pwedeng nagpapabakal nin vape sa mga menor de edad.
Napag-araman kaya na naglangkaw an numero kan mga kajovenesan na nagagamit nin vape.
Inihayag kan opisyal na obheto kan nasabing lakdang na mairayo partikular na an mga kajovenesan sa helang na pwedeng makua sa amay na pagkakaigwa nin bisyo.
