LEGAZPI CITY – Karsel an bagsak kan sarong 18 anyos na lalaki makalihis an isinagibong buybust operation sa Brgy. San Vicente Bulan, Sorsogon.
Segun ki Police Lieutenant Colonel Virgil Bibat, an hepe kan Bulan Municipal Police Station sa intrevista kan Bombo Radyo Legazpi na naarestar an suspek makalihis na pabakalan an sarong pulis na nagpanggap bilang poseur buyer.
Nakuwa sa suspetsado an limang heat sealed transparent plastic sachet na naglalaman nin mga marang dahon na pinagtutubudang marijuana na pigkakarkulong nasa 5 grams na may street values na P600.
Naisagibo man suboot an operasyon sa pakikipagtabangan kan kapulisan sa Philippine Drug Enforcement Agency Regional Office 5.
Pigtaram pa kan opisyal na napabale sa “Newly Identified Personality” an suspetsado huli ta baguhan pa sana sa kalakaran kan ilegal na droga asin kadaklan sa mga parokyano kaini an mga menor de edad.
Napag-araman man ninda na out of school youth asin dae nakatapos nin elementary asin wara na man na magurang an suspetsado na rason suboot kun kaya ini nalulon sa maraot na gawi.
Sa presente, nasa kustodiya na kan Bulan Municipal Police Station an suspetsado para sa magkakanigong disposisyon.
Huli kaini, ipighayag ni Bibat na padagos an saindang information dissemination partikular na sa mga kaakian nganing mairayo an mga ini sa ilegal na gawi na pwedesir ikaraot kan saindang buhay.
