Nadukayang wara nang buhay an sarong 11-anyos na joven na babae sa sarong sapa sa Barangay Basak, Mandaue City, Cebu.
Binisto an biktima bilang si Erica Cabatingan, incoming Grade 5 student, na naibareta na nawawara makalihis mag-ali sa saindang harong kan Lunes.
Segun sa saiyang ina na si Ruby Rose, huri siyang nahiling makalihis bumisita sa harong kan saiyang tiyahon.
Sa pagkahandal, tulos siyang nag-post sa social media nganing humagad nin tabang sa sisay mang posibleng nakahiling kay Erica.
Suspetya kan ina, pwedesir na inatake kan seizure an aki mantang pauli asin aksidenteng nahulog sa sapa.
Bisto si Erica na may kondisyon asin pirang beses nang inatake nin seizure, na kalimitang pig-aagapan kan saiyang pamilya sa paagi kan pagkugos asin pagsandig saiya nganing makabawi.
Mientrastanto, pig-asigurar kan Mandaue City Police Office (MCPO) na pig-iimbestigaran ninda an gabos na posibleng anggulo, kabale na an posibilidad nin foul play.
Segun kay PL/Col Mercy Villaro, padagos sindang nagguguno nin impormasyon hale sa mga posibleng saksi sa lugar nganing ma-araman an tunay na sanhi kan insidente.
Ipig-suhetyon man kan pulisya na isairarom sa awtopsiya an bangkay ni Erica nganing makuwa an tunay na rason kan saiyang pagkagadan.
