LEGAZPI CITY — Dakula an pasalamat kan Daraga Municipal Police sa idinonar na lote kan lokal na gobyerno kan Daraga para sa tutugdukan kan bagong hepatura kan pulisya sa may Doña Maria Subdivision.
Segun ki PSupt. El Cid Roldan, hepe kan Daraga MPS, itinao kan gobyerno lokal kan banwaan an 1000 square meters na lote na mas mahewas sa enot na kahagadan kan istasyon na 400 square meters sana.
Makalihis na mapirmahan ni Mayor Gerry Jaucian an bagong format kan absolute donation, hahalaton na sana ninda an iba pang lot plan ngane an magkaigwa nin authenticated copy na isusumite sa Camp Ola.
Nag-alokar man suboot an PNP nin P7.8 milyon para sa pagkonstruhir kan bagong istasyon.
Segun pa ki Roldan, haloy na suboot na pangiturugan kan Daraga PNP na makalipat nin istasyon huli sa medyo delikado na an presenteng hepatura ninda huli sa kahaluyan na kan panahon asin kadakol na an mga bitak kan edeficio.
Tig-ookupa man kaya kan Bureau of Jail Management and Penology (BJMP) asin Bureau of Fire Protection an nasabing edeficio.
Nakadepende man suboot an pagpuon kan konstruksyon kun makumpleto na an mga rekisitos na ipapadara sa provincial office, regional office asin sa national headquarters para sa pagpaluwas kan pondo.
Huli man sa mahewas na pwesto, plano ni Roldan na magkaigwa na nin impounding area, baraks para sa mga babaye asin lalaki, lavatory room, shower room, indoor firing range, asin parking area.
Masamok kaya suboot kun nasa atubangan kan edeficio an mga lunadan kun kaya mas maray na magkaigwa nin sadiring espasyo para sa mga lunadan.
Sa paagi kaini, mababawasan man suboot an trapiko sa banwaan asin makakabwelo na an truck kan BFP.
