LEGAZPI CITY-Magbabarewas nin $10 bilyon na energy support an Japan para sa mga nacion sa Asya sa tahaw kan matinding krisis sa suplay kan langis.
Nagtutubod man si Japan special envoy to the prime minister, Kishida Fumio, na kabale an Pilipinas sa mga enot na makikinabang digdi.
Sa pagbisita niya sa nacion, ipinaabot ni Kishida an surat ni Prime Minister Takaichi Sanae kay President Ferdinand R. Marcos Jr., na nagpapahayag nin intensyon kan Tokyo na pakusugon an kooperasyon sa energy resiliency sa irarom kan Partnership on Wide Energy and Resources Resilience Asia (POWERR Asia).
Segun kay Kishida, piglalaoman na saro an Pilipinas sa mga enot na makakaresibe nin tabang gikan sa nabanggit na programa, na obhetong pakusugon an suplay kan enerhiya sa rehiyon sa tahaw kan global disruptions.
Pinag-olayan man sa miting an pagpapakusog kan koneksyon sa liquefied natural gas (LNG) asin nuclear energy, pati an an pagpapahewas kan mga proyekto sa irarom kan Asia Zero Emission Community (AZEC), kun saen labi sa 30 proyekto an nagpapadagos sa nacion.
Tinawan doon man kan gobierno kan Pilipinas na importante an nasabing partnership sa Japan ngani mapakusog an seguridad sa enerhiya, orog na nagtetenir na maluya an global supply chains huli sa tensyon sa Middle East.
