LEGAZPI CITY-Inanunsyo ni President Ferdinand Marcos Jr. na itataga an dugang na ₱3 bilyong pondo para sa Department of Migrant Workers (DMW) ngani masierto an ligtas na pagpapauli asin kabuhayan kan mga Overseas Filipino Worker (OFW) na naapektaran kan kariribukan sa Middle East.
Segun kay Executive Secretary Ralph Recto, gagamiton an pondo para sa bilog na proseso sa pagsagip kaiba na an tabang bago pa maghale, pamasahe sa eroplano, asin mga programa sa re-integrasyon o liwat na pagpoon kan mga Pilipino sa nacion.
Basado sa huring datos, uminabot na sa 10,446 na Pilipino an ligtas na naiuli sa paagi kan mga humanitarian flight ng DMW, kaiba an mga may helang na sinagip kan mga medical personnel sa eroplano.
Pagabot sa nacion, makakaresibe an mga ini nin tabang pinansyal, psychosocial counseling, medical assessment, asin giya sa paghahanap nin trabaho.
Para sa pangkabuhayan, nagtatao an Overseas Workers Welfare Administration (OWWA) nin hasta ₱20,000 na puhunan para sa mga mawot magnegosyo.
Nagsagibo man an ahensya nin 15 job fairs sa bilog na nacion, mantang nagtagama man an Department of Education (DepEd) nin makaskas na proseso kan pagtanggap para sa mga nagbalik na OFW na lisensyadong paratukdo ngani makapagtukdo sa mga pampublikong eskwelahan.
