LEGAZPI CITY—Padagos man liwat an paghahanap kan mga otoridad sa walo sa siyam na mga nawawarang parasisira puon pa kan Enero 2, 2025.
Magigiromdoman na kan nakalihis na aldaw an saro sa mga pararasira, nadukayan na wara na nin buhay sa may parte kan Caramoran, Catanduanes.
Segun ki PDRRMO Catanduanes Emergency Operations Chief, Robert Monterola, sa intrevista kan Bombo Radyo Legazpi, na sa ngunyan wara pang nakukuang nawawarang parasisira sa may parte kan Pandan, Catanduanes.
Dugang kan opisyal na an saindang pighagad na air asset na gagamiton sa paghahanap dae magamit huli sa raot kan panahon sa probinsya.
Nagtao naman nin tabang an gobyerno probinsyal kan Catanduanes sa mga pamilya kan mga nawawarang parasisira.
Mientrastanto, nagpagiromdom an opisyal na mag-ingat lalo na ngunyan na maraot an panahon, mantang nagpagiromdom man ini sa mga parasisira na kun may abisong bawal maglawod sa kadagatan, sunudon na sana an abiso kan mga otoridad.
