Pinahimutikan ni Vice President Sara Duterte na bistado niya si dismissed policeman asin dating security officer ni former Speaker Lord Allan Velasco na si Rodulfo Gracioso Jr. asin maduong sinabi na wara siyang naresibe na anuman na kwarta hali digdi.
Sa ipinaluwas na pahayag ngunyan na Setyembre 26, sinabi kan bise presidente na pinaghahalat kan saiyang abogado an opisyal na kopya kan sinumpaang salaysay ni Gracioso hali sa National Bureau of Investigation antes puunan an mga kasong mawot isunad kontra digdi.
“Once we are done dismantling the lies contained in his testimony, it will end up in the trash bin—just like the one from Ramil Madriaga,” segun ki Duterte.
Marurumduman na enot na luminutang si Gracioso, na nagpabistong dating head of security ni dating House Speaker Lord Allan Velasco, asin pigklamar na naghatod suboot siya nin maletang may laog na kwarta ki Duterte, dating Presidente Rodrigo Duterte, asin Davao City First District Representative Paolo Duterte
Segun ki Gracioso, labi sa P2 bilyon umano suboot an naihatod niya ki Vice President Duterte sa labi sa 20 beses.
Sa saiyang pahayag, inapod ni Duterte na sarong “media stunt” an mga alegasyon asin pigduon na parte suboot ini kan pagbabalo na buhayon an impeachment case kontra saiya.
Dugang pa kan bise presidente na an saiyang kampo an maghahanda nin mga kaso kontra ki Gracios makalihis opisyal na makuwa an kopya kan affidavit kaini hali sa NBI.
