LEGAZPI CITY-Naghayag si dating senador asin Representative-elect Leila de Lima kan Mamamayang Liberal Partylist na natatakot suboot si Vice President Sara Duterte na magkaigwa nin full-blown na imbestigasyon huli ta maluwas an mga ebidensya na magpapatunay kan mga alegasyon kontra saiya siring kan salang paggamit kan confidential funds.
Sinabi ni De Lima na an takot na ini, iyo an nagpapaliwanag kun ano an minalataw na koordinadong estratehiya ngani palawigon o olangon an proseso kan Senado kabali na an pag-file kan mga legal na mosyon, pagbiyahe sa ibang nacion, asin an posibleng paggamit kan desisyon kan Ombudsman na harangon nin amay an pagbista.
Dugang pa ni De Lima, talagang cause for concern ini huli sa mayor na obheto, iyo na dae dapat magkaigwa nin trial proper hanggang dai pa pwedisir. Dai man dapat suboot iluwas an mga ebidensiya sagkod sa pa pwedisir.
Pinagbotan man kan Office of the Ombudsman, na pinangenotan kan appointee ni dating Presidente Rodrigo Duterte na si Samuel Martires, an Bise Presidente na magsumiter nin simbag sa mga kasong plunder, technical malversation, asin iba pa, basado sa report na inaprobaran kan House Committee on Good Government.
An orden na ini ipinaluwas pirang semana makalihis na aprobaran kan Kamara an Articles of Impeachment laban ki Duterte, na pendiente na ngonian sa Senado.
Sinabi pa ni De Lima na kun ibasura kan Ombudsman an reklamo, posibleng gamiton ini ngani paluyahon an kaso kan piskalya kontra sa Bise Presidente.
Pigprobaran man ni Senator Ronald dela Rosa na ibasura an mga artikulo kan impeachment, alagad pinili lugod kan Senado na ibalik an mga dokumento sa Kamara.
An lakdang na ini makusog na pigtuyaw kan mga eksperto sa ley asin pigkonsiderar kan prosecution kan Kamara bilang sarong taktika nin pag-atraso.
An kampo ni Bise Presidente nagsangat man nin appearance na “ad cautelam” sa impeachment court, na nagpapahiling kan posibilidad na magkaigwa pa nin mga procedural challenges.
Tinawan duon man ni De Lima na nagpapahiling nin pattern an serye nin mga aksyon hale sa biglang pagboot kan Ombudsman na magsangat nin counter-affidavit sa pendienteng petisyon sa Korte Suprema na nagkukuwestiyon sa pagpasar kan Articles of Impeachment.
Tinatsaran man kaini an padagos na pag-absent ni Duterte sa nacion sa tahaw kan nag-oorog na legal na isyu.
Kinumpirmar man kaini na kabale sa Articles of Impeachment an mga alegasyon may kinaaraman sa mga transaksyon sa bangko asin paggamit nin mga pekeng dokumento sa liquidation kan pondo kan publiko.
Idinagdag pa kaini na minalataw na ginagamit ni Duterte an parehong legal asin public relations strategies tanganing kontrolon an narrative asin disturbohon an proseso.
