Liwat na tinawan duon ni Vice President Sara Duterte na dae siya maatendir sa pagdangog kan House good government and public accountability panel sa Nobyembre 20, dapit sa paggamit kan pondo kan saiyang opisina asin kan Department of Education kan siya pa an sekretarya kan ahensya.
Segun ki Duterte na pagsasayang sana kan saiyang panahon an pagdangog, asin sinabing masumiter nin affidavit ngani na ipaliwanag an sadiri.
Paliwanag kaini na nag-atendir na siya kan enot alagad nagtukaw sana siya asin dae man hinapot kan mga lehislador kaya nasayang sana an saiyang panahon.
Pigtutukoy kan bise presidente an pag-atendor sa House panel inquiry kun sain nagsayuma ini na manumpa antes an pagtatao nin testimonya.
Huli sa dae panunumpa kan bise presidente, nagdesisyon an House panel members na ipagpadagos an paghahapot sa iba pang mga resource persons.
