LEGAZPI CITY – Makondusir an Comelec nin voters registration sa Agosto 1-10 para sa mga mawot magparehistro, magpalipat nin voting place, asin iba na katakod man sa mangyayaring Barangay and Sanguniang Kabataan Elections (BSKE).
Segun ki Commission on Elections Bicol Director Atty. Jane Valeza sa intrevista kan Bombo Radyo Legazpi na pagsapit kan Agosto 1 an bukas an saindang ofisina poon alas 8 nin pagkaaga hasta alas 5 nin hapon, lunes sagkod domingo asin maski holiday nganing tanggapon an mga aplikasyon kan mga botante.
Alagad paglinaw niya na dae magigin abilable sa ngonian an register anywhere project kan komisyon huli sa kakulangan nin oras mantang posible na magkaigwa nin registration satelite sa mga darakulang barangay sa rehiyon.
Plano man ninda maglipat sa dakulang venue enkaso magdagsa an mga magpaparehistro partikulamente na an mga maboto sa sangguniang kabataan election.
Pigtaram pa kan opisyal na maski dae pa pinal an petsa o ma-postpone an BSKE ngonian na taon an ipapadagos man giraray ninda an pagpaparehistro susog na man sa kasuguan ni Comelec Chairman George Garcia.
Dae man suboot masasayang an mga papel na gagamiton sa pagpaparehistro ta pwedesir pa ninda ining gamiton sa mga masunod na pirilian sa rehiyon.
Nakatalaan mang magpaluwas nin resolusyon an komisyon nganing mahiling kan publiko, kan korte, asin mga government offices an timeline na dae pwedesir mahiro enkaso maidagos an BSKE sa Disyembre.
Pangapodan man ni Valeza sa mga SK Federation na impormaron an mga youth na aprobitsaran an voters registration asin makipag-koordinar sa saindang ofisina nganing makasagibo sinda nin sattelite registration sa mga lugar na dakol an numero kan magpaparehistro.
.){kind=link}