Napiritang maghagad nin dispensa sa mga kongresista sinda Krizette Laureta Chu, na nagpabistong editor kan Manila Bulletin, siring man sinda Mary Jane Quiambao Reyes asin Mark Lopez, sa ginibo na Tri-Comm hearing sa Kamara de Representantes.
Ginisa kan House Tri-Committee an pirang pro-Duterte vloggers asin influencers, kabale an sarong editor kan Manila Bulletin katakod kan saindang mga ipinost sa social media maski na bako berepikado an mga detalye asin posibleng pigtutubudan kan iba.
Sa nasambitang hearing, sinita ni Manila Rep. Bienvenido “Benny” Abante, chairman kan House Committee on Human Rights, si Chu huli sa saiyang social media posts na may mapanlinlang asin bako beripikadong impormasyon.
Inobliga ni Abante si Chu na maghagad nin dispensa makalihis kaining aminon na an saiyang mga pahayag an nakabase sana sa mga report na warang bastanteng dokumentong patunay.
pigbalo pa kuta ni Chu na depensaran an saiyang post bilang opinyon, alagad sa liwat an uminatras asin nagtuga ini.
Mientrastanto, kinuwestiyon man ni Abang Lingkod Party-list Rep. Stephen Joseph “Caraps” Paduano an vlogger na si Quiambao-Reyes mapadapit sa saiyang pahayag na an extrajudicial killings (EJKs) an sarong panloloko.
Kan haputon kun may kapot siyang ano mang dokumento o ebidensya nganing patunayan ini, direkta niyang pigtuga na wara.
Kan haputon an influencer na si Lopez mapadapit sa saiyang mga post sa social media na may kinaaraman sa South China Sea, pigtuga ni Lopez na nagpalakop siya nin salang impormasyon.
Mientrastanto, kinuwestiyon man ni House Committee on Overseas Workers Affairs Chairman Jude Acidre si Chu katakod kan sarong post niya sa Facebook kun saan sinabi niyang kadakol na pulis an nagbutas sa saindang pwesto poon kan arestuhon si dating Presidente Rodrigo Duterte.
Inapot man ni Acidre, na siya mang Assistant Majority Leader sa Kamara, an pinagpunan kan impormasyon ni Chu, asin tinuga niyang base ini sa dae na-verify na mga post sa TikTok.
Piggiit ni Chu na ginamit niya an taramon na “daw” nganing ipahiling na dae siya syerto sa saiyang pahayag.
Alagad nagtutol si Acidre at sinabi na an mga lehitimong mamamahayag an dae nagba-base sa “general impressions” asin may mandatong syertuhon an saindang impormasyon bago ini ipaluwas.
Nagpatanid man si Acidre na an pagpapalakop nin bako berepikadong impormasyon, urog na kun mapadapit sa mga isyu kan pagpapa-otob nin ley asin pambansang seguridad, an pwedesir magkawsa nin matinding epekto sa nacion.
