LEGAZPI CITY — Matukaw na bilang acting mayor kan banwaan kan Malinao sa Albay si Vice Mayor Sheryl Capus-Bilo kasunod kan suspensyon ni Mayor Avelino Ceriola.
Sinangatan kan Sixth Division kan Sandiganbayan si Ceriola nin 90-day preventive suspension katakod kan suboot pagbalgar sa Republic Act (RA) 3019 o an Anti-Graft and Corrupt Practices Act na nakomiter kan alkalde kan magpatugdok ini nin bulangan sa Barangay Balading.
Kun babalikan, isinumiter ni Councilor Irene Fajut an kaso durante kan enot na termino kaini bilang alkalde kan 2013.
Inakusaran kaya kan konsehal si Ceriola nin conflict of interest asin wara suboot nin ano man na business permit an konstruksyon kan bulangan.
Pinirmahan ni Sixth Division Chairman, Associate Justice Rodolfo Ponferrada an nasabing desisyon.
