LEGAZPI CITY-Nairehistro an ‘very unhealthy’ na lebel kan kalidad kan paros sa mga parte kan Metro Manila ngonian na Miyerkules, huli sa padagos na transboundary haze na posibleng konektado sa padagos na mga kasulo sa Indonesia.
Susog sa Environmental Management Bureau (EMB) kan Department of Environment and Natural Resources (DENR), halangkaw na lebel kan PM2.5—pinong particulate matter na may sukol na 2.5 micrometers—an nanotaran sa mga parte kan National Capital Region (NCR).
Kabale digdi an Caloocan (University of the East), Las Piñas, Muntinlupa (Parang), Muntinlupa (Filinvest City), Parañaque (Don Bosco).
Mientrastanto, an minasunod na mga lugar nakarekord nin mga lebel kan Air Quality Index (AQI) sa pag-ultanan kan 101 asin 150, sarong hanay na pigkokonsiderar na bakong ligtas, partikularmente para sa mga sensitibong grupo arog kan mga kaakian, mga bados, asin mga senior citizens.
Kabale man sa mga apektadong lugar an mga syudad kan Mandaluyong, Manila, Marikina (Parang), Navotas, Pasay, Pateros, Quezon City (Ateneo), San Juan City, Taguig (Technological University of the Philippines o TUP), asin Valenzuela.
Inabisuhan kan ahensya an publiko na limitaran an mga aktibidad sa luwas asin magsulot nin facemask, arog kan N95 respirators, bilang precautionary measure.
