Matrayumpong na-deploy kan US Marine Corps kan nakaaging Sabado an saindang land-based missile system na Navy-Marine Expeditionary Ship Interdiction System (NMESIS) sa Balikatan 2025 sa Luzon.
Nagbale kaya an NMESIS sa Maritime Key Terrain Security Operations (MKTSO) – North events kan joint military exercise kan Pilipinas asin US.
Segun sa Balikatan 2025 Combined Joint Information Bureau, an missile system an dinisenyo nganing i-target asin pugulan an mga kaiwal na pwersang pandagat, mapamaray an kamalayan sa maritime domain asin pakusugon an depensa kan Pilipinas asin Estados Unidos sa pag-secure kan mga pangenot na lugar sa dagat.
Dugang pa kaini na an NMESIS an sarong combined and joint force na nagtatao nin flexible and expedient sea denial capacity na dakulang bagay para sa collective defense kan duwang nacion.
Naenot nang sinabi ni US Defense Secretary Pete Hegseth na magdedeploy an Estados Unidos nin kadugangang advanced na kakayanan sa Pilipinas, kabale an NMESIS, asin halangkaw na kakayanang unmanned surface vehicles sa panahon kan Balikatan exercises.
Nagpoon an Balikatan 2025 kan Lunes, Abril 21, asin madurar ini hasta Mayo 9.
Pigkakarkulong nasa 17,000 na mga tropa an nakibale sa taunang joint military exercises sa pagultangan kan Pilipinas asin Amerika.
Laoman an sarong “full-scale battle scenario” sa nasabing joint exercises.
 at Balikatan 2025 in Luzon.){kind=link}