Pinababa sa puwesto ni US Defense Secretary Pete Hegseth si Gen. Randy George bilang Chief of Staff kan U.S. Army.
Sa pahayag ni Pentagon spokesperson Sean Parnell, epektibo na an pagreretiro ni George bilang ika-41 Army Chief, maski komon na nagdudurar nin apat na taon an termino sa nasabing posisyon.
Si George an ipigdesignar kan 2023 ni dating US President Joe Biden asin nagserbi bilang career military officer na nagpartisipar sa Gulf War, siring man sa mga operasyon sa Iraq asin Afghanistan.
Dae man tulos tinawan linaw kan Pentagonan rason kan saiyang pagpapatalsik, alagad segun sa sarong opisyal, parte ini kan pagriribay nin liderato sa lado kan militar sa irarom kan administrasyon ni US President Donald Trump.
Sasalidahan si George ni Gen. Christopher LaNeve, na magseserbing acting Army Chief of Staff.
Ipigsaladawan siya bilang “battle-tested leader” na pinagkakatiwalaan kan presenteng administrasyon.
An nasabing lakdang an kasunod kan pahayag ni Trump na posibleng magtapos na sa urog na madaling panahon an tensyon sa pagultangan kan Estados Unidos, Israel asin Iran.
Puon kan magtukaw sa Pentagon, pighayag na labi sa sarong dosena na haralangkaw na opisyal kan militar na an hinali ni Hegseth, kaibanan an pamayo kan Navy asin Vice Chief of Staff kan Air Force, bilang parte kan mas mahewas na pagpapakusog kan puersa armadas kan Estados Unidos.
