LEGAZPI CITY-Nagpatanid si Ukraine President Volodymyr Zelenskyy na an Ukraine papakusogon an mga pag’atake kaini sa mga oil refinery kan Russia bilang simbag sa suboot bagong polisiya kan Moscow na maglansar nin mas mahiwas na mga airstrike laban sa Ukraine.
Susog ki Zelenskyy, an mga intelligence agencies kan Ukraine nakakua nin mga dokumento na nagbubuyagyag na an Presidente kan Russia na si Vladimir Putin nagpaluwas nin inaapod na “new doctrine” na nag-aawtorisa nin mga pag’atake sa mas mahiwas na hanay nin imprastraktura asin pasilidad sa mga lugar na urban asin rural.
Sinabi ni Zelenskyy na an operasyon may katuyuhan na takuton an mga residente asin piriton sindang magdulag sa Kyiv asin iba pang mga ciudad.
Sinabi niya na an Ukraine masimbag sa mga pag’atake sa imprastraktura kaini sa enerhiya sa paagi nin pag’atake sa mga oil refinery kan Russia, na saiyang ilinadawan bilang sarong pinagkukuanan nin ganansya para sa pagsustenir kan gera.
Alagad, pigduon ni Zelenskyy na an Ukraine dai nagpupuntirya sa mga sibilyan asin dai ma-arog sa suboot mga pag’atake kan Russia sa mga sibilyan.
Mientrastanto, sinabi kan Russia na ipapadagos kaini an inaapod kaining mga pagbalos bilang simbag sa mga pag’atake kan Ukraine.
An pakikipaglaban nagpapadagos sa sirangan na rehiyon kan Donbas, kun saen nagreport ni Zelenskyy na an Ukraine nakabawi nin mga 140 square kilometers nin teritoryo sa laog nin sarong kontra-opensiba.
