Ibinasura kan U.S. Senate an War Powers Resolution na makakalimitar kan awtoridad ni President Donald Trump na gumibo nin dugang pang aksyon militar laban sa Iran.
Sa botong 47–53, dae nakalusot an propwesto na insinunad kan mga Democrat asin pirang independents.
Sa nagin botohan, Sen. John Fetterman an solong Democrat na bumoto laban sa resolusyon, mantang si Sen. Rand Paul man an solong Republican na nagsuporta kaini.
Segun sa mga proponents kan propwesto, an katuyuhan kaini iyo na maibitaran an White House sa pagkondusir nin mga military strikes na warang awtorisasyon kan Kongreso.
Ini na an ikaduwang beses sa laog nin sarong taon na ipigbusol liwat ni Sen. Tim Kaine an War Powers Resolution manungod sa Iran, sa tahaw kan padagos na tensyon asin takot sa posibleng paglangkaw kan mga American casualties.
Sa ibong kan pagkadaog, ipigdoon kan mga Democrat na importante na ipaheling an mga checks and balances sa kapangyarihan kan presidente.
Antes pa man an lakdang sa Senado kan Estados Unidos, naglala an iriwal sa pag-ultanan kan Estados Unidos asin Iran poon kan weekend, kun sain pagkatapos kan pag-atake kan Estados Unidos, nagbalos an Tehran sa mga kaalyadong nacion kan West, kabali an Qatar, UAE, Saudi Arabia asin iba pang mga nasyon sa Middle East.
