LEGAZPI CITY – Ipigtugdok an sarong typhoon-resilient 10-classroom na two-story building sa Baras Central School sa banwaan nin Baras sa provincia kan Catanduanes.
Segun ki Department of Education Bicol Director Gilbert Sadsad sa intrevista kan Bombo Radyo Legazpi na pinangenotan ni Education Secretary Juan Edgardo “Sonny” Angara an inauguration kan nasabing edipisyo kun sain igwa pa ining solar electricity.
Ini suboot an enot na bes na nagkaigwa nin siring kaining klase nin classroom sa enterong rehiyon kompara sa mga normal na classroom na ipigtutugdok kan Department of Public Works and Highways.
Haloy na man ninda pigrerekomenda an pagkakaigwa nin typhoon-resilient classroom na kayang tumagal sa bagyong may kusog nin sagkod signal no. 5 alagad nagtetenir na problema an dakulang kantidad nin kwarta na gagamiton sa pagkonstruhir kaini.
Pigtaram pa kan opisyal na nagin magayon man an nagin reaksyon kan kalihim mapadapit sa ginibong inisyatibo na pagpapatugdok kan bagong classroom makalihis na maraot ini huli sa epekto ni Super typhoon Rolly.
Afuera pa suboot dyan an ipig-alokar na pondo na ginamit man sa pagpapatugdok nin classroom na pigmanduhan kan DPWH alagad sa kagayunan an nabawasan na an numero kan mga classroom na nakatiwangwang sa Catanduanes.
Sa pagkaka-aram niya man an piggagamit na ngonian kan mga estudyante an naunambitang typhoon proof classroom sa naunambitang provincia.
Dakula man an pasasalamat ni Sadsad sa pagkakatugdok kan nasabing edepisyo sa Catanduanes asin naglalaom siya na magdakol an typhoon-resilient classrooms sa enterong rehiyon kan Bicol.
