LEGAZPI CITY-Naipabakal na kan Bureau of Customs (BOC) an tulo pang luxury vehicles na kad-sadiri kan mag-agom na contractor na sina Sarah asin Curlee Discaya makalihis ining ipa-subasta ngonian na aldaw nin Miyerkules, Pebrero 25.
Nabakal sa Igorot Stone Kingdom Inc. an 2022 Cadillac Escalade ESV sa kantidad na haros P6,623,000-Milyon pesos.
An nasabing kompanya man an nakakuwa kan Rolls-Royce kan mag-agom sa naenot nang auction kaini kan Pebrero 11 sa presyong P29 Milyon.
Mientrastanto, nakuwa kan Cantinetta Espresso Concepts an 2024 Lincoln Navigator sa kantidad na P8,950,000-Milyon pesos, mantang napaduman man sa TDY Consumer Goods Trading an 2022 Bentley Bentayga.
Dai man naipabakal kan ahensya an iba pang high-end vehicles kan mga Discaya, kaiba an 2022 GMC Yukon Denali, 2021 Cadillac Escalade, 2022 Maserati Levante Modena, asin an 2022 GMC Yukon XL Denali.
Kabale man sa mga dai pa naipapabakal na mga magagarbong behikulo an 2024 Ferrari SF90 Stradale (Mansory), 2023 Rolls-Royce Phantom, 2022 Mercedes-Benz G650 V12 Biturbo, 2024 BMW XM, asin an 2018 Lexus LX570.
