LEGAZPI CITY- Nakapagbarewas na nin cash assistance sa mga tricycle drivers asin operators sa banwaan kan Virac, Catanduanes.
Ini an sa irarom kan Assistance to Individuals In Crisis Situations kan Department of Social Welfare and Development.
Segun ki Virac Mayor Samuel Laynes sa intrevista kan Bombo Radyo Legazpi na nasa limang Toda an natawan kan nasabing ayuda na katumbas nin labi sa 500 na mga tricycle drivers asin operators.
Napag-araman na sa bilog na island province, igwang labi sa 3,000 mga tricycle drivers asin operators na mawot man na matawan kan nasabing ayuda sa irarom kan programa.
Paliwanag kan alkalde na napapanahon sana an nasabing ayuda urog na ngunyan na nagluluya an ganansya kan mga ini huli sa pagdiit kan mga pasahero sa kasagsagan kan bakasyon kan mga estudyante.
Mientras tanto, sinabi ni Laynes na sa masunod na mga semana, posibleng matawan na man nin kaparehong cash assistance an iba pang mga natatadang Toda.
