LEGAZPI CITY – May mga mawot madangog sa ika-apat na State of the Nation Address ni President Ferdinand Marcos Jr. an mga grupo nin mga tsuper sa rehiyon Bicol.
Segun ki CONDOR PISTON Bicol Spokesperson Ramon Rescovilla sa intrevista kan Bombo Radyo Legazpi na dapat ibasura na kan presidente an wage regulation act huli ta dae man ini napapakinabangan kan kadaklan.
Afuera kaini an dae na man naco-control an paghalangkaw na presyo kan produktong petrolyo kun kaya dapat tanggalon na man an excise tax sa langis.
Kun sinda an hahaputon an literal suboot na nagtitios na sinda huli ta poon kan enot na tulong bulan an haros uminabot na sa P24,000 kada bulan an nawara saindang ganansya huli sa mga serye nin oil price hike.
Pangapodan man kaini sa administrasyong Marcos na ibalik sa limang taon an saindang prangkisa nin limang taon huli ta dae pa napapanahon ngonian para sa modernisasyon.
Paninindugan man ni Rescovilla na dae man sinda kontra sa Jeepney Modernization Program kan gobierno alagad tutol sinda sa implementasyon kaini na mawawaran nin kabuhayan an saradit na kooperatiba mantang dayuhan man na mga korporasyon an makikinabang.
