LEGAZPI CITY-Pinoonan nin amay an andas kan Poong Hesus Nazareno sa Quirino Grandstand para Traslacion ngonian na taong 2026.
Segun sa pamunuan kan Quiapo Church, bandang 3:58 nin pagkaaga ngonian na aldaw nin Biyernes, Enero 9, kan poonan an andas.
Nagpoon ini makalihis an isinagibong “Panalangin sa Bukang Liwayway”.
Mas amay ini kumpara kan mga nakalihis na taon kun sain nagpoon na mag-andar an andas bago mag-ala-singko sa pagkaaga.
Naglalaom an pamunuan kan Quiapo church na magigin amay man an paglaog kan andas huli sa nagkapirang mga pagbabago.
Kan nakalihis na taon kaya uminabot sa 20 oras asin 45 minuto an traslacion na inatendiran kan nasa 8.1 milyon na deboto basado sa pagtataya kan Philippine National Police.
