LEGAZPI CITY-Arestado an sarong top 1 most wanted person sa Casiguran Sorsogon huli sa kasong sexual abuse o panghihipo.
Segun kay Sorsogon Police Provincial Office Spokesperson, Police Major Arwin Destacamento, sa intrevista kan Bombo Radyo Legazpi, na binisto an suspek na si alyas “Pio”, 67-anyos, asin sarong paraooma.
Naarestar an suspek sa pinagsarong puwersa kan police provincial unit asin kan Criminal Investigation and Detection Group (CIDG) asin iba pang ahensya.
Ipinaluwas man an warrant of arrest kan suspek kan Agosto 27 kan RTC 5th Judicial Region, Branch 12, Family Court kan ciudad kan Sorsogon kun sain igwang pigtataong piyansa na nasa P180, 000.
Sa presente nasa kostudiya na kan provincial unit kan sorsogon an suspek.
An Act of Lasciviousness o panghihipo an nagbabayolar sa Republic Act 7610 kun sain nakapalaog digdi an kasong sexual abuse asin iba pa.
Basado man sa otoridad, an menor de edad an biktima kan suspek.
Dagdag pa kan opisyal na sarong magayon na accomplishment kan saindang himpilan an pagkaka-arestar sa mga suspek kung sain mas pinahigot ninda an kampanya sa mga nagtatago sa ley asin an public safety huli sa kinakaipuhan na madakop an siring kaining mga tawo ngani dai na magdara nin takot sa publiko.
Mientrastanto, padagos man giraray an 911 emergency hotline kun sain nagtatao nin aksyon an kapulisan sa mga kaikaipuhan na respondihan.
Pigaasigurar man suboot kan 911 sa publiko na nakikinabang an gabos digdi asin mas pinahigot pa an police response, medical response, asin iba pa bilang giya sa pagsupo kan mga krimen.
Mensahe man kan opisyal sa publiko na susuportaran kan kapulisan an kaligtasan kan gabos.
