LEGAZPI CITY – Nagin matrayumpo an isinagibong natiowide simultaneous fire drill na pinangenotan kan mga kababaihan kan Bureau of Fire Protection asin mga responders kan sarong mall sa ciudad kan Legazpi.
Segun ki Bureau of Fire Protection Legazpi Admin Section Chief Senior Fire Officer 3 Melba Ansano sa intrevista kan Bombo Radyo Legazpi na pinangenotan ninda an nasabing drill katakod kan pagselebrar kan national women’s month siring man an saindang kampanya sa fire prevention month.
Enot na bes ninda ining ginibo bilang pagmidbid na man sa kakayanan kan mga kababaihan sa pagresponde sa kasulo asin maipahiling an kontribusyon kan mga babae sa fire safety and emergency services.
Dakula an numero kan mga kababaihan na miyembro kan nasabing ahensya kun kaya mawot nindang maipamalas na kaya man ninda gibuhon an piggigibo kan mga kalalakihan sa pagtumpos nin kalayo.
Pigtaram pa kan opisyal na obheto kan drill na magin pamilyar an mga nagtatrabaho sa nasambitang mall mapadapit sa evacuation procedure asin nganing aram ninda kun ano an gigibuhon enkaso magkaigwa nin kasulo mantang yaon sinda sa laog.
Basado man sa saindang intensive campaign para sa fire safety, mababa an percentage kan kasulo sa ciudad ngonian na bulan.
Pangapodan ni Ansano sa publiko na maki-kooperar asin magsunod sa saindang pigsasagibo na mga procedures sa fire safety huli ta para man sana suboot iyan sa saindang kaligtasan asin nganing malikayan an kasulo.
