LEGAZPI CITY-–Padagos an paghatod kan TESDA Bicol nin mga scholarship programs asin training programs sa mga namamanwaan sa rehiyon.
Segun ki PIO Tesda Bicol Lianne Idjao, sa intrevista kan Bombo Radyo Legazpi, an saindang ahensya may ipig-opresir na manlaen-laen na mga scholarship programs depende sa kaipuhan kan sarong indibidwal.
Enot na digdi an Training for Work Scholarship Program na may obhetong matawan nin magkakanigong skills asin makaprodusir nin certified workers sa mga key industry sectors.
Sunod an Private Education Student Financial Assistance para sa mga estudyanteng naka-enroll sa mga pribadong institusyon.
Ikatulo, an Special Training for Employment Program na nakalaan sa mga community-based training programs na may obhetong i-engganyar an miembro kan mga komunidad para makapuon nin negosyo sa paagi kan entrepreneurial asin service-oriented activities.
Sunod an Universal Access to Tertiary Education para sa mga naka-enroll sa diploma programs kan higher education and institutions.
Igwa man na Tulong Trabaho Scholarship Program para sa pagsasanay na may kairibang industry participation na may obheto na matabangan an mga manggagawa na magre-skill asin mag-upskill.
Mantang igwa man na Rice Extension Services Program na pigpapaotob katuwang an Department of Agriculture na nakapokus sa pagtao sa mga rice farmers nin mga training programs na may kinaaraman sa pag-ooma.
An Coconut Farmers Scholarships Program katuwang an Philippine Coconut Authority kun saen an target na mga benepisyaryo iyo an mga coconut farmers asin an saindang pamilya.
Mantang an Department of Transportation katuwang kan saindang ahensya sa pagpapaotob kan ‘Tsuper Scholar’ na an mga benepisyaryo iyo an gabos na nasa sektor kan transportasyon.
Dugang kaini na an allocations para sa kada probinsya nakadepende sa numero kan mga benepisyaryo kun saen pig-aadalan kan Tesda an mga qualifications o an pinakakinakaipuhang training program kan kada probinsya saka sinda nag-aalokar nin pondo para sa mga nasambitang programs.
An mga naunambitang programa pig-opresir sa rehiyon kan Bicol.
Mientrastanto, sinabi kan opisyal na sa mga mawot na magkua nin mga scholarship asin training programs pwede sindang mag-inquire sa mga provincial offices sa rehiyon sa kun ano an mga abelableng programs na pwedesir na sinda mag-enroll.
