LEGAZPI CITY — Target na matapos ngonian na semana an pagpapatindog kan mga temporary learning spaces (TLS) na magagamit kan mga estudyante sa provincia kan Albay na apektado kan nagpapadagos na aktibidad kan bulkang Mayon.
Sa intrevista kan Bombo Radyo Legazpi kay DepEd Divisions Information Officer Nick Bio, nasa 80% na ngonian an
natapos na mga TLS asin 16 units na sana an kinakaipuhan.
Segun digdi, an banwaan na sana kan Camalig an may kakulangan sa mga temporary classrooms huli ta kinaipuhan na ilipat an nagkapira sa mga ini makalihis magkaigwa nin decampment kan maapektaran kan ashfall an nagkapirang mga evacuation centers.
Sa presente, nagpapadagos an pagtitindog nin mga construction kan nasambitan na TLS sa Palanog Elementary School asin Baligang Elementary School.
Napag-araman na igwang allocated na 112 units kan temporary learning spaces sa probinsya para sa 1st asin 2nd batch.
Mientras tanto, pighahalat pa sa presente an approval kan DepEd Central Office para sa dugang pang TLS na hinagad kan provincia.
