LEGAZPI CITY-Preparado nang magpahiling kan saindang kakayahan an team Pilipinas sa maabot na 20th Asian Games—poon Setyembre 19 hasta Oktubre 4—asin sa ika-5 Asian Para Games, na nakatalaan sa Oktubre 18 hasta 24 sa Aichi-Nagoya, Japan.
An contingent kan Pilipinas makikipagkumpetensya sa 43 na manlaen-laen na sports disciplines. Sa kaenot-enoti sa kasaysayan kan torneo, limang bagong sports an opisyal na maluwas kabale an padel, teqball, surfing, BMX freestyle, asin Mixed Martial Arts (MMA).
An Weightlifting junior world record holder na si Albert Ian Delos Santos asin an Olympic boxing medalist na si Aira Villegas an mangengenot sa Team Philippines bilang official flag bearers kan nacion.
Si Delos Santos, sarong tubong Zamboanga, saro sa mga pighahalat na marhay kan mga kalaban, na nakakua nin mga bulawan na medalya asin nagbugtak nin mga bagong rekord kan mga junior world asin Asian sa weightlifting.
Kaiba niya bilang flag bearer, an Olympic boxing medalist na si Aira Villegas, na nagtao man nin dakulang onra sa nacion.
An superstar sa tennis na si Alex Eala kabali man sa mga midbid na atleta na piglalaoman na magtatao nin orog pang onra sa nacion.
Mientrastanto, pig-anunsyo ni Philippine Sports Commission (PSC) Chairman Patrick Gregorio, durante kan send-off ceremony, makakaresibe nin dagdag na insentibo an lambang atleta asin coach na P6,000 bilang suporta sa saindang kampanya.
