LEGAZPI CITY – Naglalaom an Teachers Dignity Coalition na ma-iimbestigaran kan mga otoridad an insidente kan pambabadil kan sarong estudyante sa saiyang paratukdo makalihis na bagsakon ini.
Segun sa Chairman kan grupo na si Benjo Basas sa intrevista kan Bombo Radyo Legazpi na kadakol na mga isyu an dapat hilingon sa nangyaring paggadan sa pambadil huli ta hababaw na rason nganing maghantong sa siring kaining insidente.
Nanagpodan man sinda nin dugang na seguridad sa mga eskwelahan asin policy sa pagtatao nin grade kan estudyante sa paagi kan pagtatabangan kan mga stakeholders bako sana an mga paratukdo.
Sa nakalihis na limang taon an nakapagrehistro na man sinda nin pambabadil sa laog kan mga eskwelahan kun kaya palaisipan sainda kun pano nakakalaog an mga badil sa kun irigwa nin mga gwardya.
Pigtaram pa kan opisyal na kaipuhan na higpitan an seguridad sa mga eskwelahan huli ta nagkakaigwa nin epekto sa mga paratukdo asin estudyante an siring kaining mga pangyayari.
Suhestyon niya man an pagkakaigwa nin scanner asin metal detector nganing masyerto na warang dara an mga malaog sa mga eskwelahan nin mga badil o anumang armas.
Huli sa mga siring kaining insidente an nababawasan an kompyansa kan publiko manungod sa pagigin safest place kan mga eskwelahan.
Pagirumdom ni Basas na magin rigmat asin tulos na aksyunan an mga kakaibang hiro kan mga estudyante mantang dapat bantayan an paglaog kan mga outsiders nganing maibitaran an mga pambabadil o iba pang insidente sa mga eskwelahan.
