LEGAZPI CITY — (Update) Buminadol na sa kabilugan na P185.2 million an danyos sa sektor kan agrikultura sa Albay katakod kan nag-aalburotong bulkang Mayon, basado sa report ni Provincial Agriculturist Cherryl Rebeta.
Napag-araman na pinakadakulang porsyento kan nadanyaran na commodity an bagas na nag-aabot sa labi sa P139 million na pigsusundan kan high value commercial crops sa P20.8 million.
Nakapagrehistro man nin danyos sa agricultural product na mais na labi sa P4 milyon; abaca sa labi sa P400, 000 asin sa sektor kan pagsisira na labi sa kabangang milyon an nadestroso afuera pa digdi an iba pang produkto.
Mientras tanto, nagpromesa man an Department of Agriculture-Agricultural and Credit Policy Council (DA-ACPC) sa pag-‘fast track’ kan tabang para sa mga apektadong paraoma kan pitong banwaan asin tolong ciudad.
Makaka-avail an mga ini kan P25,000 interest free loan sa irarom kan Survival and Recovery (SURE) Program mantang an mga dae apektado ng eruption an posibleng maka-avail kan collateral free loans puon P25,000 hasta sa P150,000 sa irarom kan Production Loan Easy Access (PLEA) Plan.
Magigirumduman na enot naman na nag-commit si Presidente Rodrigo Duterte kan financial assistance na P100 million sa paagi kan DA hale sa Quick Response Fund (QRF) kan ahensya.
Inasegurar man kan Provincial Government of Albay sa pangengenotan ni Governor Al Francis Bichara sa pakikipagtabangan sa DA na susundon an guidelines sa credit assistance asin makakaabot an tabang sa lehitimo asin totoong apektado.
