LEGAZPI CITY – Preparado na an syudad kan Legazpi para sa pag-host kan Palarong Bicol 2017.
Segun ki Cecile Rivera, Schools Division Superintendent ng Department of Education (DepEd) Albay, 90% nang preparado an syudad asin pighahalat na sana an mga partisipantes.
Nagpapadagos man suboot ngunyan an preparasyon kan city government sa mga billeting centers espesyalmente an tubig.
Dugang pa ni Rivera na naglilibot an mga opisyal ngani na mag-monitor asin mahiling an sitwasyon kan mga ini alagad dae pa naaabot an gabos na centers.
Nagpuon na suboot na mag-abot an mga deligados kan Enero 28 alagad an kadaklan sa mga ini an piglalaoman na maabot sa Pebrero 2.
Tinawan duon man kaini na kun igwang nahiling na problema, kinakaipuhan na maipaabot ini sa saindang joint operations center na hali pa sa manlaen laen na government agencies ngani na maaraman an problema asin tulos na matawanan nin kasimbagan.
Inimbitaran man an Strong Man of Asia na si Betino Bordeos bilang huespe de onor.
Pigduon man ni Rivera na gigibuhon an gabos ngani na maibitaran na magkaigwa nin dayaan asin mamantenir an magayon na kawat.
