LEGAZPI CITY- Pigseselebrar ngunyan na aldaw an ika-16 na taon kan pagigin syudad kan Tabaco.
Maogmang sinabi ni Tabaco City Mayor Krisel Lagman-Luistro na ngunyan an sweet 16 kan saiyang pinamamayuhan na munisipalidad.
Dakol na man suboot na aktibidad an isinagibo antes pa man an aldaw na ini arog kan selebrasyon kan National Women’s Month.
Naoogma suboot an alkalde huli ta sa nakalihis na taon puon kan magin syudad an lugar, nahiling na marhay an pagtalubo kaini.
Sigon sa alkalde, dakulang tabang an pagigin syudad huli ta apwera sa pondo, nagkakaigwa nin koneksyon sa nasyunal na gobyerno.
Sa ngunyan, nakatutok suboot an city government of Tabaco sa pagkonstuhir nin sea wall sa mga coastal barangays.
