LEGAZPI CITY — Bagsak sa karsel an sarong welder na ipigtutukdong nanghabas kan ataman na litson kan barangay kapitan sa Barangay Gumabao, Oas, Albay.
Sa ekslusibong intrevista kan Bombo Radyo Legazpi ki PO2 Romy Regalario, investigator-on-case kan Oas Municipal Police, an biktima mismo na si Kapitan Danilo Luis an nagpasiring sa hepatura tangarig i-report an insidente nin panghahabas kan suspek na si Salvador delos Poyos, 48-anyos kan Barangay San Isidro kan parehong banwaan.
Segun sa biktima, nawara na sana an apat na atamang litson na nagkakantidad nin poco mas o menos P20,000.
Nabisto man an suspek makalihis na mahiling kan kapitan an itom na wallet na nawalat sa lugar na laog an expired driver’s license asin voter’s ID ni Poyos.
Tulos man na nagkondusir nin hot pursuit operation an mga personahe kan Oas PNP na nagresulta sa pagkakadakop sa suspek.
Sa ngonian, nagtetenir na sa kustodiya kan pulisya an suspek mantang ipighahanda an kasong isasangat kontra digdi.
