LEGAZPI CITY — Nakalibre na an sarong wanted person na naarestar kan mga otoridad makalihis na magbayad nin magkakanigong piyansa sa Ligao City.
An suspek na si Jennevie Baldonado, 38 kan Barangay Tastas, ciudad kan Ligao an nahahampang sa walong counts kan pagbalgar sa Batas Pambansa Bilang 22 o an Anti-Bouncing Check Law.
Segun ki P/Lt. Col. El Cid Roldan, hepe kan Ligao City Police, sa intrevista kan Bombo Radyo Legazpi, isinangat an kaso kontra sa suspek sa Metropolitan Trial Court Branch 18 Manila kan March 8, 2019.
Sinabi ni Roldan na naarestar an suspek sa Barangay Dunao makalihis na mahiling kan mismong nagkaso an suspek sa sarong establisiyemento.
Tulos suboot ining nag-apod sa mga kapulisan asin naiserbi an warrant of arrest.
Dugang pa kan hepe, dae naman dinara pa si Baldonado sa Manila huli ta nagbayad na ini kan piyansa na P6,000 kada count o kabilugang P48,000.
Napag-aramang may binakal na mga items an suspek sa biktima asin binayadan ini nin tseke alagad nagtalbog ini kan ipa-encash.
