Nagtetenir mang bastante an mga supply kan sibulyas sa nacion kasunod kan nagin paghalangkaw kan presyo kaini sa mga nakalihis na semana, segun sa Department of Agriculture (DA).
Paliwanag ni DA Assistant Secretary for Special Concerns and Official Development Assistance asin Spokesperson Arnel De Mesa, piglalaoman na hasta Pebrero na mamamatean an dagos na pagbaba kan mga presyo kaini sa mga merkado nin huli sa mga nakaimbak na sibulyas sa mga cold-storage facilities.
Ini an sakto sa magigin harvest kan mga paraooma para sa mga bagong ani kan sibulyas na hasta Marso an peak harvest.
Pag-asigurar man ni De Mesa na warang rason nganing maghalangkaw an presyo kan sibulyas nin huli ta dawa maubos man an mga sibulyas sa mga storage facilities an tulos na mapapalitan nin mga bagong ani.
Mientrastanto, sa latest price monitoring kan ahensya sa mga merkado an nagkakawat na sa mga presyo na P100 hasta P180 an kada kilo kan pulang sibulyas sa mga merkado sa Maynila.
