Kinumpirmar kan mga kompanya nin langis an mga enot na naireport na sagkod Abril na sana an ihahaloy kan saindang suplay huli sa nagyayaring kariribokan sa Middle East.
Sa ikaduwang hearing kan Proactive Response and Oversight for Timely and Effective Crisis Strategy (PROTECT) kan Senado, pigtuga ni Tanya Samillano, presidente kan Independent Philippine Petroleum Companies Association na hanggang Abril sana an fuel deliveries para sa saindang miyembro.
Nagkapira sa mga miyembro kaini an Eastern Petroleum, FilOil, SeaOil, UniOil, Flying V, asin LiquiGaz.
Sinabi ni Samillano na wara pa sindang nareresibe na kumpirmasyon mapadapit sa mga masunod na deliveries pagkatapos kan Abril.
Sinabi man ni Chevron Philippines Inc. president asin Country Chairman Pongtorn Tangmanuswong na an saindang imbentaryo an sagkod sa huring semana na sana kan Abril.
Segun man ki Shell Pilipinas Corp. president and CEO Lorelie Quiambao-Osial, na kun magtitinir an kariribokan sa Middle East, magkakaigwa nin limitadong suplay nin produktong petrolyo sa bilog na kinaban.
Ipighayag man ni Jetti Petroleum, Inc. Corporate Affairs Manager Johann Marc Aseoche na nadidipisilan sindang imantinir an saindang supaky asin sa ngunyan sagkod 20 aldaw na sana an ihahaloy. Alagad igwa sindang papaabot na order na saindang inangkat sa Malaysia, China, asin South Korea.
Solamenteng an Petron sana an nagsabi na sagkod Mayo pa an ihahaloy kan saindang produktong petrolyo.
