LEGAZPI CITY—Nakapagrehistro nin sunod-sunod na aksidente nin behikulo sa banwaan kan Daraga sa probinsya nin Albay huli kan pag-uuran.
Segun ki Daraga Public Safety Office PIO Lorenzo Bañas sa intrevista kan Bombo Radyo Legazpi, na an pinakahuring nangyaring aksidente an nairehistro sa Barangay Kiwalo kun saen sarong motorista an naka-slide sa tinampo asin tinabangan na man ini kan Daraga Municipal Disaster Risk Reduction Management Office.
Dugang pa digdi na may nairehistro man na aksidente sa may boundary kan Sipi asin Peñafrancia na kun saen napag-araman na nasa impluwensya nin arak an sarong motorista asin nakabangga ini sa sarong bus, na tulos man ining nirespondehan kan MDRRMO Daraga asin dinara sa ospital para sa asistensiyang medikal.
Sinabi kan opisyal na an saro sa posibleng kawsa kan mga nasambitang aksidente iyo an mahalnas na kalsada huli kan pag-uuran sa lugar.
Naka-deploy man 24-oras an saindang mga personahes para magtaong asistensya en kaso man may mga untoward incidents sa naunambitang banwaan.
Mientrastanto, nagpatanid man an opisyal sa mga motorista na kun bako na passable an mga tinampo, dae na magpirit na mag-agi pa huli ta baka maaksidente pa an mga ini.
