LEGAZPI CITY – Padagos an pagsasagibo nin imbestigasyon kan Sto. Domingo Municipal Police Station mapadapit sa pagkuwa sa hawak kan sarong lola sa Sto. Domingo Public Cemetery.
Segun ki Sto. Domingo MPS OIC Police Captain Victor Borjal sa intrevista kan Bombo Radyo Legazpi na pigpaapod na an sepulturero asin pighagad na man an kopya kan cctv poon kan alas sais nin banggi hasta alas dose nin mamaaga nganing mahiling kun sisay an mga nagralaog sa sementeryo.
Pigbabantayan na ninda an saindang person of interest asin nagkakalap pa nin mga ebidensya asin impormasyon na makakatabang sa pagsusunad nin kaso nganing matawan nin hustisya an pamilya kan biktima.
Pig-aaram ninda kun ano an pinakamotibo kan suspek sa paggibo kan nasabing insidente.
Piglinaw kaini na dae pa naaarestar an suspetsado nin huli ta circumstancial evidence pa sana an saindang nakukuwa asin kaipuhan pa nin mga patunay sa pag-arestar arug suboot kan mandamiento de aresto sa ibong kan aram na ninda kun siisay ini asin kun ano an ginamit niyang behikulo pasiring sa sementeryo.
Desidido na man suboot an pamilya kan biktima sa pagsusunad nin kaso sa suspetsado.
Pangapodan ni Borjal sa publiko na makipagtabangan sa sainda kun may aram sa nasambitang pangyayari nganing maparikas an pag-usad kan kaso.
