LEGAZPI CITY- Naipasar na kan Sangguniang Panlalawigan an resolusyon na nagdedeklarar kan state of calamity sa provincia huli sa padagos pang naglalangkaw na kaso kan dengue.
Sa intrevista kan Bombo Radyo Legazpi kay Board Member Victor Ziga an Vice Chair kan Committee on Crisis and Management, aminado an opisyal na hudyan na an deklarasyon kan state of calamity alagad dakula an maitatabang kaini nganing masolusyonan an problema.
Segun kay Ziga, magagamit na sa ngunyan an calamity fund kan lokal na gobyerno nganing makapagtaong tabang sa mga barangay na naapektaran kan helang lalo na sa may dakol na mga kaso kan dengue.
Pinag-uulayan pa man sa ngunyan kan sanggunian kung pirang porsyento kan pondo an ipapaluwas nganing magamit sa anti-dengue campaign.
Napag-araman na enot naman na nagdeklarar an banwaan kan Daraga na saro sa mga lugar na may pinakadakol na kaso kan dengue.
