LEGAZPI CITY- Dagos-dagos an mga naoobserbarang maluluya asin sporadic o warang regular na interval na lava fountaining events sa bulkang Mayon sa mga nakalihis na oras hale sa ngimot kaini.
Dawa pa tipikal na natatahuban nin mahibog na panganuron an upper slope kan bulkan, nairehistro man kan mga instrumento kan Philippine Institute of Volcanology and Seismology (PHIVOLCS) an magkakasuway na lava fountaining na nagdudurar nin lima hasta 20 minuto na sana.
Nagbaba man an duration kan nasabing aktibidad kun ikukumparar sa mga nakalihis na aldaw puon tolong minuto hasta sa labi sa tolong oras.
Base pa sa latest volcano bulletin kan PHIVOLCS, mantenidong halangkaw an mga nairerehistrong pagyugo sa bulkan sa 99 volcanic earthquakes.
Padagos man an paghubag kan bulkan base sa electronic tilt at GPS data na indikasyon kan pressure kan papasakat na magma.
Mientras tanto, nag-abot na sa 4.2 kilometers an inabot kan bulos kan pyroclastic materials na nag-aambag sa lahar deposits sa Basud Gully, 4.5 kilometers sa Bonga Gully mantang pinakahalaba sa Mi-isi Gully sa 4.6 kilometers.
