LEGAZPI CITY- Mayor na pighihiling na problema kan Land Transportation Office (LTO) Bicol an kakulangan ninda sa manpower kun kaya nagpapalyar na matutukan nin 100% an gabos na tinampo sa bilog na rehiyon.
Sinabi ni Mar Majistrado, LTO Bicol chief, na 15 sana an enforcers kan ahensya sa Bicol kun kaya naglalaom sinda sa tabang kan mga pulis sa pagmanehar kan trapiko.
Nagtutubod man ini na kinakaipuhan nin dakol na traffic enforcers ngani na mabawasan an mga aksidenteng nangyayari aro-aldaw sa mga tinampo.
Ini suboot an saindang magigin suhestyon sa magigin pag-oolay ngunyan na aldaw dapit sa pagresolbar sa problema sa padagos na paglangkaw kan road accidents sa probinsya kan Albay kaibanan si Governor Al Francis Bichara.
Sigon ki Majistrado, dapat na magkaigwa nin special task force sa lambang distrito kan Albay na iyo an makapot kan regular na special operation sagkod banggi.
Dakula suboot an saiyang pasasalamat sa inapod nyang “welcome development” na lakdang kan provincial government na mataong dalan sa mga posibleng solusyon sa problemang kikahampang ngunyan kan mga transport agencies.
Ngani na mareyalisar ini, sinabi kan opisyal na dapat na magtarabangan an gabos huli ta gabos man kita road users.
