LEGAZPI CITY-Magpapaotob an Spain nin border controls sa gabos na air asin sea travel hale sa Italy mantang mas matindi an dai pagkakasinabutan kan duwang nacion mapadapit sa migration row.
Nag-ugat ini makalihis na temporamenteng suspendihon kan Italy an Schengen Agreement, na nagtataong paagi sa malayang pagbiyahe sa pagitan kan kadakol na European countries.
Huli digdi, naghagad an Spain sa Italy na halion an mga border checks kaini kan nakaaging semana, alagad, tinanggihan ini kan Rome asin sinabing dai tatanggapon an “ultimatums” kan España.
Napagaraman man na mahaloy nin sarong bulan an sanction, maliban kun magbabago an sitwasyon.
An ultimatum napag-araman man na isasairarom sa passport, nationality asin visa checks an mga biyaherong Italyano asin iba pang dayuhang hale sa Italy.
Naenot nang nagpaotob an Italy nin kaparehong restrictions matapos dumagsa an pigkakarkulong 78,000 illegal migrants hale sa Morocco pasiring sa sa Spanish exclave na Ceuta.
Alagad nilinaw kan Italy an dai sakop kan dugwang na checks an mga Spanish citizen na naglalaog sa nacion.
Sinabi kan Italy na magtetenir an border checks kaini hasta Agosto 15 huli sa pinaglalaomang panibagong dagsa kan illegal migrants sa Ceuta.
Pinabulaanan man ini kan Madrid asin sinabing warang bastanteng basehan an posisyon kan Rome huli ta an mga migranteng naglalaog sa Ceuta, wara man suboot nin pamamaraan ngani direktang makalaog sa Schengen area.
