Nangapudan si Senate President Sherwin Gatchalian sa mga magurang asin sa mga lokal na gobierno na aktibong makipartisipar sa pagpugol sa naglalalang kadahasan sa mga eskwelahan sa paagi kan mas mahigot na pagpapaotob kan Parent Effectiveness Service (PES) Program.
Ginibo ni Gatchalian an pangapudan kasunod kan pambabadil sa sarong eskwelahan sa Tacloban City na pigkaimbweltuhan nin mga menor de edad.
Marurumduman na sa pinakahuring report, apat na an binawian nin buhay sa insidente.
Huli digdi, kinuwestyon kan Senate President kun papano nagkaigwa nin access sa mga badil an imbwelto na mga menor de edad asin kun papano sinda nakanuod na gumamit kaini sa amay na edad.
Segun sa senador na importante na pakusugon an papel kan pamilya sa paghubog sa ugali kan mga jovenes ngani na maibitaran an paglala kan kadahasan sa laog asin luwas kan mga eskwelahan.
Tinukoy ni Gatchalian an Parent Effectiveness Service Program sa irarom kan Republic Act No. 11908 o Parent Effectiveness Service Program Act.
Obheto kan ley na pahewason an kaaraman asin kakayanan kan mga magurang asin parent-substitutes sa pag-otob sa saindang mga responsibilidad.
