LEGAZPI CITY—Nagin matrayumpo asin matoninong an ikinundusir na eleksyon kan Lunes, Mayo 12, sa provincia kan Sorsogon.
Segun ki Sorsogon Police Provincial Office Public Information Officer, Police Major Arwin Destacamento, sa intrevista kan Bombo Radyo Legazpi, wara sindang nairehistrong election-related incidents o ano man na karahasan durante kan pirilian.
Maabot sa 1,198 na mga personahes kan Philippine Army, Maritime Group, Philippine Coast Guard, asin Bureau of Fire Protection, an nai-deploy sa 495 na voting centers sa probinsya.
Sa presente, nasa full-alert status man giraray an saindang ahensya katakod kan nangyaring eleksyon.
Mientrastanto, nagpasalamat man an opisyal sa mga personahes siring kan mga paratukdo, barangay tanod, asin iba pa na nagtabang nganing magtao nin seguridad asin magserbi sa mga botante.
