LEGAZPI CITY- Ipiglatag na an security measures kan mga kapulisan sa Sorsogon katakod kan paparaning kapaskuhan.
Segun kay Sorsogon Police Provincial Office Spokesperson Police Major Arwin Destacamento sa intrevista kan Bombo Radyo Legazpi na nagkondusir na nin mga meetings an saindang opisina asin gobyerno probinsyal kan Sorsogon nganing masyerto na mamamantenir an pazy-orden asin security deployment.
Pigtaram kaini na mas papahiguton kan saindang esfuersos an pagbabantay partikular na sa mga matatawong lugar kun sain aram nindang dadagsaon kan publiko.
Nagdeploy na man sinda nin kapulisan sa mga nagkapirang port nganing maasigurar an kaligtasan kan mga byahero asin turistang mabisita sa probinsya na gikan sa Visayas asin Mindanao.
Malatag man nin seguridad an saindang kapulisan sa mga nagkapirang tourist destination sa probinsya nganing masyerto na warang mangyayaring maraot sa saindang mga bisita.
Tansya ni Destacamento na madakol an bilang kan behikulong maagi sa mga pampublikong tinampo asin mga highway sa probinsya ngunyan na paparani ki paparani ang kapaskuhan asin bagong taon.
Pangapodan kaini sa publiko na magin rigmat asin doblehon an pag-iingat sa mga siring kaining selebrasyon kasabay kan saindang promesa na matao ini nin safety sa mga lambang sorsoganon asin turista na mapasiring sa probinsya.
