LEGAZPI CITY—Preparado na an Sorsogon Police Provincial Office na magserbi para sa papaabuton na eleksyon sa Lunes, Mayo 12, 2025.
Segun ki Sorsogon Police Provincial Office Public Information Officer Police Major Arwin Destacamento, sa intrevista kan Bombo Radyo Legazpi, nai-deploy na an kadaklan sa saindang mga kapulisan sa mga polling precincts sa probinsya kan Sorsogon.
Afuera sa mga kapulisan, yaon man an suporta kan ibang ahensya siring kan Philippine Coast Guard asin Philippine Army kun saen may sadiri man ining mga lugar na ide-deployan.
Sa presente, wara pa man na nairehistrong posibleng maghatod nin kariribokan na may kinaaraman sa eleksyon.
Alagad, dae man pighahali an mga siring na posibilidad kun kaya mas pinahigot kan saindang opisina an monitoring asin koordinasyon sa intel community.
An nasabing lakdang an huli sa direktiba kan PNP chief na pahigoton an seguridad nganing masierto an salbado, maayos asin matoninong na pirilian.
