LEGAZPI CITY- Nangapudan an grupo nin mga paraoma na magpaotob an gobierno nin price control sa presyo kan bagas sa nacion.
Ini an sa tahaw kan halangkaw na presyo kan nasabing produkto na nagpapasakit sa mga nagtitios na Pilipino.
Segun ki Bantay Bigas Spokesperson Cathy Estavillo sa intrevista kan Bombo Radyo Legazpi na warang epekto an plano kan administrasyon na pagpapaotob nin price cap sa imported na well-milled rice huli ta halangkaw man liwat an P50 kada kilo.
Paliwanag kaini na nadidifisilan ngunyan an mga namamanwaan huli sa kawaran nin abot kayang bagas sa merkado.
Suhestyon kan grupo na suspendiron an rice liberalization law na nagbabawal sa gobierno na mag subsidize sa presyo sa merkado ngani na paramientras na maibsan an presenteng krisis na naeeksperyensyahan kan mga Pilipino.
Mientras tanto, ipig-aagrangay man kan grupo an nagkapirang sitwasyon kun sain ipinambabayad utang sana kan mga paraoma an saindang produkto huli sa kakulangan nin ganansya sa pagtatanom.
