LEGAZPI CITY – Bako pang salbadong kaunon an mga shellfish asin alamang sa kadagatang sakop kan Milagros, Masbate asin Sorsogon Bay.
Nagluwas sa pinakahuring pag-eksamin kan Bureau of Fisheries and Aquatic Resources (BFAR) na positibo man giraray an mga ini sa paralytic shellfish poison o red tide toxin na lagpas sa regulatory limit na 60 micrograms.
Katakod kaini, mahigot an paguirumdom ni BFAR Bicol information officer Nonie Enolva sa publiko na ibitaran muna an pagkonsumo kan mga lamang-dagat na hali sa mga nasabing lugar.
Enot nang pigpensar na nagbaba na an lebel kan toxin sa samples na pig-adalan sa initial reveal test kan Disyembre 21 asin 28, 2020 alagad suway an nagluwas sa confirmatory test kan central office.
Pinag-aadalan na man an mga posibleng nakapag-trigger kan paglangkaw kan algal bloom kaibanan an paglangkaw kan agriculture asin industrial waste, mga pag-uran asin an gamit kan troll fishing.
Mientras tanto, nasa 1, 500 na mga parasira sa shellfish industry an apektado kan penomena, segun ki Enolva.
Igwa man na ipig-oofrecer na tabang para sa mga marginalized fishers na katampad kan Social Amelioration Program (SAP) kun sain 6, 000 an napaabutan na kan P30 million na alokasyon.
Target man ining matapos antes an Pebrero.
