LEGAZPI CITY- Nangapudan an sarong lehislador ki Presidente Rodrigo Duterte na tawanan nin military honors an namaaram na Bicolano icon na si Eddie Garcia na nagadan sa edad na 90-anyos makalihis an nagkapirang aldaw na pakikibaka sa ospital.
Sa intrevista kan Bombo Radyo Legazpi ki Ako Bicol Partylist Rep. Pido Garbin Jr., afuera sa military honors magkakanigo man suboot na ikaag an bandera kan Pilipinas sain man na parte kan nasyon sa half-mast bilang pagbisto sa nagin ambag sa industriya kan “Manoy” sa showbiz.
Napag-araman na ugos na mag-amigo an duwa na nagin magkaharani an boot makalihis na i-endorso ni Eddie an partido puon kan maitugdok ini.
Segun pa ki Garbin, magkakaigwa man nin memorial visit sa Bicol University tangarig mahiling man an aktor kan mga kapwa Bicolano an mga esfuersos kaini sa lado kan sining.
Magigirumduman na nagkapirang semana nang na-comatose sa ospital an aktor makalihis na maaksidente mantang nasa taping sa bagong TV series.
